Ritskoðun eða ritstýring?

Fyrir nokkrum mánuðum síðan varð mikið uppnám innan bloggsamfélagsins þegar Morgunblaðið ákvað að loka ákveðinni bloggsíðu þar sem viðkomandi bloggari hafði til langs tíma stundaði það að ausa skítkasti yfir ákveðin trúarbrögð og fylgjendur þeirra trúarbragða. „Ritskoðun“ var orðið sem hæst var hrópað á hinum ýmsu bloggsíðum og athugasemdum. Nú er svipuð hystería farin aftur í gang þar sem ákveðið hefur verið að loka á að þessi bloggari geti bloggað um fréttir á mbl.is. Ástæðan mun vera að viðkomandi hefur verið að tengja ýmsar bloggfærslur við fréttir á mbl.is án þess að þær hafi á nokkurn hátt tengst fréttunum. Morgunblaðið tekur því upp á því að loka á að þessi bloggari geti haldið þessu áfram, enda í samræmi við þær reglur sem blog.is setur notendum sínum, en hefur ekki lokað á viðkomandi blogg. Og enn og aftur er galað um að hér sé ritskoðun á ferðinni og viðkomandi bloggari kveinkar sér hástöfum og sparar ekki stóru orðin.

En hvað er blog.is? Jú, á blog.is stendur að „blog.is er vefur rekinn af Morgunblaðinu þar sem einstaklingar geta opnað sínar eigin bloggsíðu“; „mbl.is áskilur sér rétt til að loka fyrir fréttatengingar notenda sem tengja ítrekað særandi eða óviðurkvæmilegar bloggfærslur við fréttir eða færslur sem koma fréttinni ekkert við“; að „notandi samþykkir að miðla ekki ólöglegu efni, áreiti, hótunum, særandi skrifum eða nokkru öðru sem getur valdið skaða. Notandi samþykkir sérstaklega að miðla ekki háði, rógi, smánun, ógnun eða ráðast á mann eða hóp manna vegna þjóðernis, litarháttar, kynþáttar, trúarbragða eða kynhneigðar, í samræmi við ákvæði 233. gr. a. almennra hegningarlaga nr. 19/194“. Og ekki síður að „Morgunblaðið áskilur sér rétt til að grípa inn í, bregðist notandi ekki við óskum eða tilmælum um leiðréttingar/lagfæringar á skrifum sem teljast meiðandi eða brjóta gegn skilmálum þessum.“

Augljósara er það varla, til að geta bloggað á blog.is gengst maður undir ákveðnar reglur og kvaðir og getur átt von á að Morgunblaðið grípi inn fari maður ekki eftir þessu. Á móti útvegar Morgunblaðið okkur vettvang til að blogga án endurgjalds.

Málið er einfalt: Ef maður treystir sér ekki til að fara eftir þeim reglum sem Morgunblaðið setur á maður á hættu að það sé lokað á bloggið eða gripið sé til annarra úrræða af hálfu Morgunblaðsins.  Þá er tvennt í stöðunni: Að sætta sig við þessar reglur og halda áfram á blogga á blog.is eða færa sig annað með sitt blogg, líkt og viðkomandi virðist ætla nú að gera. Allt tal um ritskoðun er út í bláinn. Morgunblaðið, eins og allir aðrir fjölmiðlar, hefur fullan rétt á að ritstýra því efni sem þar birtist, hvort heldur á prenti eða á vefnum.

Og í raun er virðingarvert hvað starfsfólk blog.is hefur verið umburðarlynt gagnvart viðkomandi bloggara sem hefur iðulega verið með skæting og skítkast í garð nafngreindra starfsmanna Morgunblaðsins. Það er því kannski viðeigandi að ljúka þessu með orðum Fríkirkjuprestsins forðum daga: „Farið hefur fé betra“.