Stutt í næstu kosningar?

Það gæti orðið styttra í næstu kosningar en margur heldur. Vinstri grænir og Samfylking halda áfram í stjórn eins og þeir báðir hafa líst ítrekað yfir. Og það mun örugglega ganga í einhvern tíma en fyrr eða síðar kemur að stóra málinu; ESB. Annar flokkurinn vill þangað inn, hvað sem tautar og raular, og hinn flokkurinn er hugsanlega til í að skoða málið ef meirihluti þjóðarinnar kýs svo en er annars heitur á móti.

Í áratugi var afstaða manna til Atlantshafsbandalagsins (NATO) og veru bandarísks herliðs hér á landi það sem helst klauf fólk og flokka í heitar fylkingar og gat jafnvel sprengt ríkisstjórnir. Í dag ber varla á umræðu um þetta mál, þó svo að enn sjáist stundum „Ísland úr NATO“ slagorð er það í dag frekar hjáróma miðað við hitann í kringum það mál hér á árum áður.

Nei, á næstu mánuðum og árum verður það afstaðan til ESB og hvort Ísland eigi að sækja þar um aðild eður ei sem á eftir að verða hitamálið og það mál sem getur sprengt ríkisstjórnir. Því þykir mér ólíklegt að það ríkisstjórnarsamstarf haldi í fjögur ár. Þannig að það gæti orðið aftur kosningar innan fjögurra ára, allavega myndi það ekki koma mér svo mikið á óvart.

Áherslan á ESB lýsir taugaveiklun

Athugasemdir

[Örvar Már Marteinsson, 25.4.2009 kl. 00:20]

Ég er alveg handviss um það að vinstri stjórnin heldur velli í 4 ár. Þeir hanga á valdastólunum eins og hundar á roði og þagga niður allan ágreining. Ég tel að vinstri grænir muni lúffa í Evrópumálunum - þeir geta bara ekki gefið það í skin núna. Steingrímur mun svo afsaka það til harðra ESB andstæðinga í flokknum með því að ríkisstjórn á félagslegum grundvelli hafi verið mikilvægari og að allt sé gerandi til að halda Sjálfstæðisflokknum frá völdum - og það gæti fallið í kramið.

Ég hef heyrt vinstri menn halda því sjálfir fram að stjórnin springi eftir 1-2 ár í þeirri von að skúffaðir Sjálfstæðismenn sitji heima á kjördag eða skili auðu (hugsi með sér að vinstri stjórnin sitji hvort sem er ekki lengi). Það er plott og herbragð upprunnið hjá vinstri flokkunum sjálfum.

Ég er ekki svo bjartsýnn - AUÐUR ER RAUÐUR.